Teklareerata ja maksaa veroja
Täälä sie saatat lukea tähelisiimat teklareeramisesta ja veron maksamisesta.
Ko sie saat sisäletulon yli vissin tason sie piät maksaa veron. Se oon se joka maksaa sisäletulon sulle joka pittää maksaa sisäle veron Verotoimistolle. Vero pittää siis olla jo piätetty ko sie saat sisäletulon. Sulla oon oikeus saaja tilispesifikasuunin elikkä vastaavan joka kerta ko sie saat sisäletulon. Spesifikasuuni näyttää kunka paljon veroa ulosmaksaja oon vetäny.
Kerran vuessa sie piät jättää sisäletuloteklarasuunin Verotoimisthoon ette vero tullee olheen aivan oikein. Sitä kuttuthaan ette sie teklareeraat. Teklarasuuni jällaa sitä sisäletuloa mitä sie sait vuotta ennen ko sie teklareeraat.
Ko sie olet teklareeranu Verotoimisto räknää ulos jos sinun vero oon tullu oikein. Viimisthääns joulukuussa sinä vuona ko sie teklareeraat sie saat preivin Verotoimistolta, ”loppuveroilmotus”. Siinä seisoo jos sie piät maksaa lissää veroja (rästiveroja) elikkä jos sie saat takashiin veroja (tulovero)
Kukas pittää teklareerata?
Sie piät aina teklareerata jos sulle oon lähätetty teklarasuuni. Teklarasuuni tullee postin matkassa elikkä sinun tikitaahliin preiviloohvaan, jos sulla oon semmonen (Billo, Kivra elikkä Min myndighetspost).
Vississä taphauksissa sie piät teklareerata vaikka sie et ole saanu teklarasuunia
Jos sie et ole saanu teklarasuunia sie piät kuitenki teklareerata jos sie saatat vastata joo johonki seuraahviin sanohmiin:
- Sie asuit Ruottissa koko 2025 ja sinun sisäletulo oli korkeampi ko 24 872 kruunua ko sie esimerkiksi sait palkan, sulla oli oma yritys elikkä sie sait vanheempainrahan.
- Sie asuit Ruottissa osan vuesta 2025 ja sinun sisäletulo oli korkeampi ko 100 kruunua Ruottissa ko sie esimerkiksi sait palkan, sulla oli oma yritys elikkä sie sait vanheempainrahan.
- Sulla oli kapitaalisisäletulo Ruottissa joka oli 200 kruunua elikkä enämpi vuen 2025 aikana. Kapitaalisisäletulo saattaa esimerkiksi olla räntty säästämisestä elikkä voitto aktsie-elikkä muista arvopaperimyynistä. Se saattaa kansa olla voitto asuntomyynistä elikkä asunon uloshyyräämisestä.
- Sulla oli sisäletuloja pienyrityksestä vuen 2025 aikana. Se saattaa esimerkiksi olla ulosjako, etuja elikkä muuta korvausta. Pienyritys oon aktiseyritys josssako korkeinthaans neljä henkilöä yhessä omistavat enämpi ko puolet aktsieista.
- Sie omistit fastiheetin, elikkä osan fastiheetistä, 1 tammikuuta 2025. Fastiheetti oon esimerkiksi talo, vapa-aikatalo likkä tontti.
- Sie olet saanu preivin Verotoimistolta (”käskyn”) ette sie piät jättää teklarasuunin. Käskyn sie saat postin kautta elikkä sinun tikitaahliin preiviloohvaan.
Sie saatat tarvita teklareerata vaikka sulla oon sisäletuloja muusta maasta ko Ruottista. Sivula Deklarera inkomster från utlandet, sie löyät tetaljeerattua informasuunia siittä.
Sie joka olet asunu ulkomaila koko vuen saatat vississä taphauksissa tarttea teklareerata Ruottissa.
Mitäs teklarasuunissa pittää olla matkassa?
Nämät oon esimerkkiä sisäletuloista jokka pitävät olla matkassa teklarasuunissa:
- tili ja muu korvaus jotako sie saat työn yhtheyessä
- pansuuni
- vanheempainraha ja tilapäinen vanheempainraha
- ränttyjä säästämisestä esimerkiksi pankossa
Nämät oon esimerkkiä sisäletuloista jokka ei piä olla matkassa teklarasuunissa:
- etapleerinkikorvaus, etapleerinkilisä ja asuntolisä
- elatustuki
- paarnpiitraaki, asuntoavustus ja asuntolisä
- opintoraha CSN;istä
Koskas sie piät teklareerata?
Sie piät jättää sisäle sinun sisäletuloteklarasuunin Verotoimisthoon viimisthääns 4 toukokuuta.
Jos sie teklareeraat 31 Maaliskuuta saatat saaja sinun maholisen tuloveron jo huhtikuun alussa. Mutta silloin sie tarttet teklareerata e-palvelun, sms:in, kautta elikkä soittamalla. Sie et saa tehhä mithään muutoksia. Ette esimerkiksi jättää liitheen räknäthään muutokseksi.
Jos sie teklareeraat jälkhiin 31 Maaliskuuta sie saat rahat jälemin vuen aikana.
Jos sie tarttet enämpi aikaa ette teklareerata
Jos sie tarttet enämpi aikaa ette teklareerata sie saatat hakea lykkäystä. Silloin sie saat teklareerata viimisthääns 2 Kesäkuuta sen siihaan. Met tarttema saaja sisäle sinun lykkäyshakemuksen viimisthääns 4 toukokuuta.
Sie saatat hakea lykkäystä jollaki seuraavalla laila:
- Lokkaamalla sisäle verotoimisthoon osotheela: skatteverket.se, jos sulla oon e-lekitimasuuni
- soittamalla Verotiethiin, 0771-567 567 (muusta maasta +46 8 564 851 60)
- käymälä palvelukontturissa.
Kunkas sie täytät teklarasuunin?
Se joka maksaa ulos sinun sisäletulot oon usseimiten ilmottannu Verotoimisthoon mitä sie olet tienanu vuen aikana. Sen takia Verotoimisto oon jo täyttäny sisäle rahamäärän siinä teklarasuunissa jonka met lähätämmä sulle. Rahamäärä jonka sie näet teklarasuunissa oon sinun pryttutulo, siis sinun sisäletulo ennen veronaavtraakia.
Jos kaikki oon oikein
Jos se mitä teklarasuunissa seisoo oon oikein sie et tartte ko kirjottaa alle ja jättää sisäle teklarasuunin. Lue lissää täältä: Kunkas sie lähätät sisäle teklarasuunin./Hur skickar du in deklarationen?
Jos sie tarttet muuttaa elikkä lisätä jotaki
Joskus sie tarttet muuttaa elikkä lisätä jotaki teklarasuuhniin. Se saattaa esimerkiksi riippua siittä ette sinun työnantaja oon jättäny väärät tiot Verotoimistolle elikkä ette sie olet myyny asunon elikkä arvopaperia.
Jos sie meinaat muuttaa elikkä lisätä jotaki sie tarttet teklareerata e-palvelussa Sisäletuloteklarasuuni 1 elikkä paperiteklarasuunila. Sulla pittää olla ruottalainen e-lekitimasuuni jos sie muutat teklarasuunia e-palvelussa. Yks poikkeus oon aavtraaki reisuista töihiin ja sieltä pois, jotako sie saatat tehhä e-palvelussa kootlaki. Lue lissää: Kunkas sie lähätät sisäle teklarasuunin.
Oleks saanu oikean perusaavtraakin?
Ko sie asut ja olet töissä Ruottissa sulla oon usseimiten oikeus perusaavtraakhiin. Perusaavtraaki oon aavtraaki jonka Verotoimisto tekkee sinun sisäletuloista tilistä, maksoista elikkä vastaavista ennen ko met räknäämä ulos sinun veron. Sen takia aavtraaki usseimiten takottaa ette sie tarttet maksaa vähempi veroa. Jos sulla oon yksityinen yritys perusaavtraakia räknäthään kansa toiminan sisäletuloista.
Siittä vuestä lähtien ko sie täytät 67 perusaavtraaki oon korkeampi.
Tämän näköset säänöt oon perusaavtraakille:
- Jos sie olet asunu ja sulla oon ollu sisäletulo Ruottissa koko vuen aikana sulla oon oikeus perusaavtraakhiin koko vuele.
- Jos sue olet asunu ulkomaila osan vuesta mutta teklareeranu vähhiinthääns 90 prosenttia
- Jos sis olet asunu ja jos sulla oon ollu sisäletulo Ruottissa osan vuesta sulla oon oikeus perusaavtraakhiin niistä kuukauksista ko sie olet asunu täälä.
Verotoimisto oon usseimiten tehny perusaavtraakin sinun teklarasuunissa ko sie saat sen. Jos met emmä ole tehneet siä, elikkä jos sie tykkäät ette perusaavtraaki oon liika matala, sie tarttet itte kirjottaa tähhään: Övriga upplysningar/Muita tietoja, kunka monta kuukautta sie olet ollu töissä Ruottissa menny vuona ja ette sie halvaat perusaavtraakin sille aijale.
Onkos sulla ollu kostanuksia joistako sie saatat saaja aavtraakia?
Jos sulla oon ollu kostanuksia ette saattaa olla töissä, sie saatat vississä taphauksissa tehhä aavtraakia niistä sinun teklarasuunissa. Aavtraaki tekkee ette vero laskee. Sie saatat esimerkiksi saaja aavtraakia ko:
- sie tarttet reisata pitkhään töihiin ja sieltä pois
- sie asut muussa paikassa ko missä sinun pere assuu sen takia ko sie olet töissä sielä.
Onkos sulla yksityinen yritys?
Jos sulla oon yksityinen yritys sie piät kansa täyttää semmosen niin sanotun elinkeinoplanketin (NE-liitheen). Sen sie jätät yhessä sinun teklarasuunin kansa. Elinkeinoliitheesheen sie täytät sisäle tietoja sinun yrityksen toiminasta. Elinkeinoliitheen nimi oon SKV 2161 ja sie saatat kirjottaa ulos sen osotheelta: skatteverket.se elikkä tilata sen soittamalla Verotiethoon numerolla 0771-567 567.
Oon olemassa opas kunka sie täytät teklarasuunin. Opas oon ruottiksi ja englantinkielelä.
Kunkas sie lähätät sisäle teklarasuunin?
Sie saatat lähättää sisäle teklarasuunin jollaki seuraavista tavoista:
- sms:aamalla
- soittamalla
- e-palvelun kautta Sisäletuloteklarasuuni 1/Inkomstdeklaration 1
lähättämällä sisäle paperiteklarasuunin.
Teksti sms-palvelussa, e-palvelussa ja teklarasuunissa oon ruottiksi. Jos sie teklareeraat soittamalla sie saatat saaja informasuunin tuottiksi elikkä englantinkielelä.
Kootit sisäletuloteklarasuunissa
Teklarasuunissa jonka sie olet saanu, oon usseimiten kootia. Sie saatat käyttää kootia ette teklareerata.
Jos sie et ole saanu kootia se riippuu usseimiten siittä ette sie tarttet muutta jotaki teklarasuunissa.
Jos sie olet menettänny kootit sie et valitettavasti saa uusia. Se jällaa kansa jos kootit oon heittänheet toimimasta sillä ko jotaki oon muutettu sinun teklarasuunissa jälkhiin ko Verotoimisto täytti sen.
Jos sulla ei ole kootia sie saatat sen siihaan teklareerata e-palvelussa, jos sulla oon e-lekitimasuuni. Muuten sie saatat teklareerata paperiteklarasuuhniin.
Sms:ilä
Sie saatat teklareerata sms:ilä jos kaikki seuraavat oon oikein sulle:
- Sie olet saanu teklarasuunin kootitten kansa
- Sie piät vain hyväksyä teklarasuunin.
- Sulla oon ruottalainen mupiliapunemangi.
Näin sie teklareeraat sms:ilä
- Ota näköselle teklarasuuni ja tarkasta ette tiot oon oikein.
- Hae sinun henkilökohtaset kootit.
- Ota framile kooti allekirjotukselle. Sms:aa sinun henkilönumero elikkä vastaava ja kooti allekirjotukselle numehroon 71144. Älä käytä mithään maankootia ennen 71144, vaikka sie olet muussa maassa ko Ruottissa. Älä unhouta välilyöntiä henkilönumeron ja kootin välissä allekirjotukselle. Esimerkiksi: VVKKPPNNNN 99999999.
- Oota sitä sms:iä jonka sie saat takashiin. Sms:i toistaa ette sie olet teklareeranu. Se saattaa viipyä kymmentheen minuthiin ennen ko sie saat sen.
- Säästä sms-toistus.
Jos kooti allekirjottamiselle ei toimi se johtuu siittä ette jotaki sinun teklarasuunissa oon muutettu jälkhiin ko se lähätethiin sulle. Silloin sie tarttet teklareerata e-lekitimasuunila e-palvelussa Inkomstdeklaration 1/Sisäletuloteklarasuuni 1) elikkä paperiteklarasuunila.
Soittamalla
Sie saatat teklareerata soittamalla jos sie olet saanu teklarasuunin kootila jos sie meinaat vain hyväksyä teklarasuunin. Näin sie teklareeraat soittamalla:
- Ota näköselle sinun teklarasuuni ja tarkasta ette kaikki tiot oon oikein.
- Hae sinun henkilökohtaset kootit. Net oon teklarasuunin spesifikasuunissa.
- Soita 020-567 100 (+46 8 764 92 40 jos sie soitat muusta maasta ko Ruottista). Seuraa sisälepelatuita ohjeita. Sie saatat saaja ohjeet englantinkielelä elikkä ruottiksi. Oota siiheen asti ette sie kuulet ette ilmotus luethaan ylös telefoonissa. Ilmotus toistaa ette sinun teklarasuuni oon tullu sisäle. Ilmotus säästethään, niin sie saatat soittaa ja kuula sen uuesti jos sie halvaat.
E-palvelun kautta
Jos sulla oon ruottalainen e-lekitimasuuni sie saatat tehhä kaikkia jollako oon teklarasuunin kansa tekemistä e-palvelussa Inkomstdeklaration 1.
Jos sulla ei ole ruottalaista e-lekitimasuunia, mutta olet saanu teklarasuunin kootitten kansa, sie saatat lokata sisäle palvelhuun kootila jokka sie löyät teklarasuunin spesifikasuunissa.
Sielä sie saatat hyväksyä teklarasuunin ja tehhä maholisia reisuaavtraakia, mutta ei muita muutoksia.
Näin sie teklarareeraat e-palvelussa:
1.Lokkaa sisäle e-lekitimasuunila elikkä itenttifieerinkikootila jokka sie löyät sinun teklarasuunin spesifikasuunissa. Sie tarttet kansa kirjottaa sinun henkilönumeron elikkä vastaavan. E-palvelu oon ruottiksi.
2. Tarkasta tiot teklarasuunissa ja tehe net muutokset mitä tarttee. Jos sie olet lokanu sisäle kootila sie saatat tehhä aavtraakia reisuista töihiin ja sieltä pois, mutta ei muita muutoksia.
3. Hyväksy teklarasuuni sinun e-lekitimasuunila elikkä kootila allekirjotukselle jonka sie löyät teklarasuunin spesifikasuunissa. Sie saat varsin kuitin joka näyttää ette sinun teklarasuuni oon tullu Verotoimisthoon.
Paperiteklarasuunissa
Jos sie piät teklareerata sie olet usseimiten saanu täytetyn teklarasuunin lähätetyksi sulle paperille elikkä tikitaalin preiviloovan kautta, jos sulla oon semmonen. Jos sie et ole saanu teklarasuunia, mutta tiät ette sie piät teklareerata, sie saatat soittaa Verotiethoon elikkä mennä palvelukontturhiin ette sie saat paperiteklarasuunin.
Näin sie teklareeraat paperiteklarasuuhniin:
- Tarkasta tietoja teklarasuunissa.
- Jos sie tarttet muuttaa mithään: tehe se kirjottamalla sisäle uusi totalisumma valkehaan ruuthoon siinä rivilä jotako sie halvaat muuttaa.
- Kirjota alle teklarasuuni.
- Pane friimerkki kuerthiin ja lähätä teklarasuuni Verotoimisthoon
Skatteverket
Inläsningscentralen
Inkomstdeklaration 1
FE 8000
107 75 Stockholm
Jos joku muu tarttee teklareerata sulle
Sie saatat antaa jonku muun teklareerata sulle jos sie tiät ette sulla tullee olheen hankala tehhä sitä itte. Silloin sie piät hakea Verotoimiston tykönä ette henkilöstä tullee sinun teklarasuuniasiahenkilö.
Hae viimisthääns kuukautta ennen ko sie piät teklareerata. Sie saatat hakea Verotoimiston e-palvelussa Ombud och behörigheter/Asiahenkilö ja pätevyyksiä elikkä planketin kautta. Planketti oon englantinkielelä ja ruottiksi. E-palvelu ei ole ko ruottiksi.
Ko Verotoimisto oon hyväksynny sinun teklarasuuniasiahenkilön se henkilö tullee jatkamhaan olheen sitä, Verotoimiston rekisterissä, siiheen saakka ette sie ilmotat Verotoimisthoon ette henkilö ei ennää piä olla asiahenkilö.
Saaja takashiin veroja- tulovero
Jonku aikaa jälkhiin ko sie olet teklareeranu sie saat sinun loppuveroilmotuksen. Siinä seisoo jos sie saat takashiin veroja, niin sanottu ulovero. Tulovero saattaa esimerkiksi riippua siittä ette se joltako sue saat sisäletulon oon vetäny liika paljon veroa.
Loppuveroilmotuksessa seisoo kansa kunka paljon sie piät saaja takashiin.
Kunkas ja koskas sie saat sinun tuloveron?
Ette saaja sinun tuloveron sie tarttet ilmottaa Verotoimistolle sinun pankkokonttunumeron. Jos sulla ei ole pankkokonttua sie saatat soittaa Verotiethoon telefoonila 0771-567 567 elikkä mennä palvelukontturhiin.
Jos sie ilmotat konttunumeron viimithääns ko sie jätät sinun sisäletuloteklarasuunin sie saat auttomaattisesti rahat konthuun. Jos sie ilmotat konttunumeron jälemin sie piät itte vaatia rahat sisälepantuksi konthuun. Sen sie tehet soittamalla Verotiethoon 0771-567 567 elikkä ette sie käyt palvelukontturissa.
Ilmota konttunumero ruottalaisessa pankossa
Jos sulla oon ruottalainen e-lekitimasuuni sie saatat ilmottaa sinun konttunumeron Verotoimisthoon samala ko sie teklareeraat e-palvelussa Inkomstdeklaration 1/Sisäletuloteklarasuuni 1. Sie saatat kansa ilmottaa kontun e-palvelussa Skattekonto/Verokonttu.
Jos sulla ei ole ruottalaista e-lekitimasuunia sie saatat ilmottaa konttunumeron Verotoimisthoon. Sie saatat tehhä sen jollaki näilä alla olevista tavoista:
Ilmota konttunumero ulkomaanlaisessa pankossa
Jos sulla ei ole ruottalaista konttunumeroa sie saatat saaja sinun tuloveron ulkomaanlaisheen pankkokonthuun.
Näin sie ilmotat Verotoimisthoon ulkomaanlaisen konttunumeron:
- Kirjota preivi ette sie halvaat ilmottaa ulkomaanlaisen pankkokontun Verotoimisthoon. Preivi pittää sisältäänämät tiot:
- Sinun nimi, sinun ruottalainen henkilönumero elikkä yhtheensovitusnumero ja kontaktitiot jossako Verotoimisto saattaa saaja sinun kansa yhtheyttä.
- IBAN ja BIC ulkomaanlaisele pankkokontule.
- Sinun allekirjotus ja sinun nimiselvitys.
- Sinun nimi, sinun ruottalainen henkilönumero elikkä yhtheensovitusnumero ja kontaktitiot jossako Verotoimisto saattaa saaja sinun kansa yhtheyttä.
- Laita alkuperäsen toistuksen ulkomaanlaiselta pankolta. Toistus ei saa olla vanheempi ko kuus kuukautta ja siinä pittää olla:
- Taatumi ko toistus kirjotethiin.
- Sinun nimi ja sinun ruottalainen henkilönumero elikkä yhtheensovitusnumero.
- Sinun osote ja sinun telefooninumero.
- IBAN ja BIC sinun pankkokontule.
- Allekirjotus ja nimiselvitys pankon yheltä työntekiältä.
- Lähätä preivi sinun tioitten ja toistuksen kansa:
Skatteverket
205 30 Malmö
Verotoimisto käyttää konttunumeroa niin kauon ette sie olet ilmottannu meile jotaki muuta.
Maksaa lissää veroa – rästivero
Jonku aikaa jälkhiin ko sie olet teklareeranu sie saat sinun loppuveroilmotuksen. Siinä seisoo jos sie tarttet maksaa lissää veroja, niin sanottua rästiveroa. Rästivero saattaa riippua siittä ette se joltako sie saat sisäletulon oon maksanu liika vähän veroa Verotoimisthoon.
Loppuverotiossa seisoo kansa kunka paljon sie piät maksaa ja koska Verotoimisto viimisthääns tarttee saaja rahat.
Koskas sie piät maksa?
Sie piät maksaa 90 päivän sisäle siittä ko sie olet saanu sinun loppuveroilmotuksen. Taatumi ko rahat viimisthääns pitävät olla Verotoimiston kontussa seisoo loppuveroilmotuksessa, mutta sie saatat maksaa sinun rästiveron ko sie olet saanu sinub teklarasuunin.
Räntty
Kunkas sie piät maksa?
Sie maksat pankkojiirun kautta pankkojiirunumehroon 5050-1055. Sie saatat kansa maksaa Swish:in kautta mutta silloin sie piät lokata sisäle osotheele: skatteverket.se ruottalaisela e-lekitimasuunila ja seurata instryksuunia. Instryksuunit oon vain ruottiksi.
Sie piät maksaa ruottin kruunuila. Älä unhouta tarkastaa aktyelliä valyttakursia.
Maksaa internettipankossa pankkojiirun kautta
Sie saatat maksaa sinun internettipankossa pankkojiirun kautta. Silloin sie täytät sisäle summan mitä sie piät maksaa ja sinun OCR-numeron (referensinumero). OCR-numero seisoo loppuveroilmotuksessa ja sinun sisäletuloteklarasuunissa.
Sie saatat kansa ottaa selvää sinun OCR-numeron Verotoimiston palvelussa, joka ei ole ko ruottiksi. Kirjota henkilönumero elikkä vastaava ruuthuun Person- eller organisationsnummer. Klikkaa sitten ruuthuun Beräkna.
- Verotoimiston palvelu ette ottaa selvää OCR-numeron (ruottiksi):
Maksaa pankkojiirun kautta sisälemaksokuitila
Jos sie maksat pankkojiirun kautta jo täytetyllä sisälemaksokortila sie et tartte ko täyttää summan. Sie saatat tilata täytettyjä sisälemaksokorttia soittamalla Verotiethoon elikkä mennä yhtheen palvelukontturhiin.
Muista ette se ottaa jonku pankkopäivän ennen ko rahat tulevat perile Verotoimisthoon.
Maksaa ulkomaanlaisesta pankosta
Ette maksaa ulkomaanlaisesta pankosta toimiii samhaan laihiin ko ette maksaa ruottalaisesta pankosta. Silloin sie tarttet täyttää sisäle nämät tiot:
- IBAN-numero: SE56 8000 0890 1196 4624 0516
- BIC-/Swiftkooti: SWEDSESS
- Pankko: Swedbank AB, SE-105 34 Stockholm
- Maksovasthaanottaja Skatteverket, SE-831 87 Östersund
- Sinun henkilönumero elikkä OCR-numero
Jos sie tarttet syvenettyä informasuunia teklarasuunista
Muila sivuila osotheela: skatteverket.se oon syvenettyä informasuunia sisäletuloteklarasuunista. Sitä oon vain ruottiksi ja joskus englantinkielelä.
Jos sie tarttet perustheelista informasuunia ja sie et käsitä sitä ruottalaista elikkä englantinkielistä tekstiä sie olet tervetullu käyhmään palvelukontturissa elikkä soittamhaan Verotiethoon 0771-567 567.