Deklaririn thaj platin (pokin) taksa
Akate arakhela pe informacija ko sajavera (razna) čhibja bašo deklariribe.
Akate šaj te čitine odova soj najvažno bašo deklariribe hem (thaj) bašo platibe taksa. Akava teksti tano sar ki švedikani čhib adžahar ko javera čhibja. O teksti ki švedikani čhib šaj arakhea te klikindžan ko phuvjakoro globus upro i šerali rubrika.
Keda lea lovelejbe (primibe love) dži ko jek nivo tegani trebela te platine (pokine) taksa. Okova so platinela tuke o lovelejbe ov tano odova so platinela i taksa e Skatteverketeske. I taksa znači ka ovel tutar cidimi keda ka le o love. Tut isi pravo te del pe tuke tle platakiri specifikacija ja pale diso slično keda lea lovelejbe. I specifikacija sikavela kobor taksa cidindža okova so platinela tuke.
Kaj te šaj i taksa te ovel sa točno trebela te mukhe e Skatteverketeske jekh vare ko berš lovelejbaskiri deklaracija. Bašo odova vakerela pe kaj tu deklaririneja. I deklaracija važinela bašo lovelejbe so leljan ko berš so nakhlja angleder te deklaririne.
Keda ka deklaririne tegani o Skatteverket računinela dali tli taksa tani točno. Najkasno ko decembar ko odova berš so deklaririnea ka avel tuke jek ljil kotar o Skatteverket jek ”paluno taksakoro rešenje”. Othe terdžola dali trebela te platine buteder taksa (panda taksa) ja pale ka iranel pe tuke palal taksa (taksakoro palal iranibe)
Ko ka deklaririnel?
Tu ka deklaririne sakova var te bičhaldža pe tuke jek deklaracija. I deklaracija avela poštaja ja pale ki tli digitalikani lilengiri pošta, te isi tut asavki (Billo, Kivra ja pale Min myndighetspost).
Ko disave situacije tu ka deklaririne uzal odovada so tuke na ali disavi deklaracija.
Te na ali tuke deklaracija tu pale ka deklaririne te šaj te odgovorindžan oja ko disave kotar akala tekstia tele:
- Tu bešljan ki Švedija ko sa o vakti (vreme) ko 2023 berš hem leljan buteder kotar 22 207 krune hem odola love leljan ko primer sar plata, sine tut tli firma ja pale leljan dajengere-dadengere love.
- Tu bešljan ki Švedija jek kotor kotar o 2023 berš hem leljan buteder kotar 100 krune ki Švedija hem odola love leljan ko primer sar plata, sine tut tli firma ja pale leljan dajengere-dadengere love.
- Tut sine jek kapitalieskoro lejbe love ki Švedija ko 2023 berš 200 krune ja pale buteder. Jek kapitaleskoro lejbe love šaj te ovel ko primer kamata kotar šparibaskere love ja pale čari kotar o biknibe akcie ja pale javera kučlila. Odova šaj te ovel hem kotar biknibe ja pale dejbe ki kirija stani.
- Ko 2023 berš tu leljan love kotar haridženegiri firma. Odova šaj te ovel ko primer ulavibe love, beneficie ja pale javera love. Jek haridženegiri firma tani jek akcijikano khedibe kori so ola zaedno isi olen buteder taro ekvaš akcije.
- Tu isi jek objekti ja pale jek kotor taro jek objekti ko1 januari 2023 berš. Jek objekti tano ko primer jek vila, jek slobodno vaktiskoro kher ja pale phuv.
- Tuke alo jek ljil kotar o Skatteverket (jek ”föreläggande”/ ”anglorešenje” kaj tu mora te mukhe deklaracija. Jek anglo rešenje avela tuke poštaja ja pale ki tli digitalikani lilengiri pošta.
Tu šaj ka trebel te deklaririne mada te ovel tut lindo love kotar jek javer Phuv a na kotar i Švedija. Ki strana Deklaririn lovelejbe kotar aver phuvja, othe šaj arakhea detalirimi informacija bašo odova.
Tu so bešljan avri e phuvjatar jek celo berš ko disave situacie tu ka trebel te deklaririne ki Švedija.
So trebela te ovel ki deklaracija?
Akava tano primer bašo lovelejbe so trebela te ovel ki deklaracija:
- lata ja pale javera love so lea keda kereja buti
- penzia
- dajengere-dadengere love hem privremeno dajengere-dadengere love
- kamate kotar šparibe ko primer kotar jek banka.
Akava tano primer bašo lovelejbe so na trebela te ovel ki deklaracija:
- etabliribaskere love, etabliribaskoro dodatko hem khereskere love
- arakhibaskere love
- čhavengere love, khereskoro dodatko
- studiribaskere love kotar o CSN
Keda ka deklaririne?
Tu trebela te mukhe tli lovelejbaskiri deklaracija ko Skatteverket najkasno ko 2 maj.
Tu te deklaririndžan najkasno ko 3 april tegani te isi tut te le taksakoropalal lejbe (iranibe love palal) šaj te le olen ko početko kotar o april masek. Ama tegani tu trebela te deklaririne e e-servizea, sms, e Skatteverketeskere apea ja pale telefoneja. Na smineja ni te menine diso. Tu te dodanjdžan jek dokumenti odova računinela pe sar menibe.
Te deklaririndžan palo 3 to april tegani ka o love ka aven tuke hari pokasno ko odva berš.
Te trebela tuke buteder vakti bašo deklariribe
Te trebindža tuke buteder vakti bašo deklariribe tegani šaj te rode vakteskoro barakreribe (odložibe). Tegani tu šaj te deklaririne najkasno ko 16-to maj. Amenge ka trebel tlo rodibe bašo vakteskoro barakeribe najkasno ko 2-to maj.
Tu šaj te rode bašo vakteskoro barakeribe ko sajavera čhanija:
- Logibaja ko skatteverket.se, te isi tut jek e-legitimacija
- Telefoniribaja ko Skatteupplysningen 0771-567 567 (kotar jek javer Phuv +46 8 564 851 60
- Džajbaja ki jek servizeskiri kancelarija.
Sar phereja i deklaracija?
Okova so platinela tli plata obično informirinela e Skatteverkete kobor love leljan ko odova berš. Odoleske o Skatteverket pherdža angleder i suma ki tli deklaracija so bičhaldžam tuke. I suma so dikheja ki deklaracija odova tano tlo bruto lovelejbe, mangela te phenel pe o love anglder te čhinavel pe taksa.
Tej sa točno
Tej točno odova so terdžola ki deklaracija tegani tu trebela te čhive tlo anav hem te mukhe i deklaracija. Čitin (drabar) buteder ko Sar bičhalea i deklaracija.
Te trebindža te keren diso javer ja pale te čhiven diso
Disavo var ka trebel te kere diso javer ja pale čhive diso ki deklaracija. Odova šaj ka trebel odoleske so ko primer o bitideari (poslodavco) mukhlja bangi informacijako Skatteverket ja pale odoleske so tu bikindžan jek stani/kher ja pale kučaleljila.
Te trebela te kere diso javer ja pale te čhive diso tegani trebela te deklaririne ko e-servizi Lovelejbaskiri deklaracija 1 ja pale ki lilali deklaracija. Kaj te šaj te kere javer ki deklaracija ko e-servizi trebela te ovel tut jek švedikani e-legitimacija. Jek izuzetko tano o cidibe bašo drumo dži ki buti hem kotar i buti, bašo odova tu šaj te kere ko e-servizi ama hem kodencar. Čitin buteder ko Sar bičhalea i deklaracija.
Dendža pe tuke točno fundavnocidibe (grundavdrag)?
Keda bešea hem kereja buti ki Švedija obično isi manuše pravo te kerel fundavnocidibe. O fundavnocidibe tano jek cidibe so kerela o Skatteverket kotar tle lovelejbe kotar plata, honorari ja pale slična javera platibe angleder te računina tli taksa. Odoleske o cidibe obično značinela kaj tu ka trebel te platine pohari taksa. Te isi tut jekh firma tegani računinela pe o fundavnocidibe hem kotar o love kotar odoja buti. Kotar o berš keda pherea 67 berša tegani o fundavnocidibe tano bareder.
Adžahar tane o regularija bašo o fundavnocidibe:
- Tu te bešljan hem te sine tut lovelejbe ki Švedija ko sa o berš tegani isi tut pravo te kerel pe fundavnocidibe sa e beršeske.
- Tu te bešljan avri e phuvjatar jek kotor taro berš ama deklaririnea najhari 90 procentija kotar tle lovelejbe kotar o berš ki Švedija, tegani isi tut pravo bašo fundavnocidibe sa e beršeske.
- Tu te bešljan hem te sine tut lovelejbe ki Švedija ko jek kotor taro o berš tegani isi tut pravo bašo fundavnocidibe bašo odola masekija so bešljan akate.
O Skatteverket obično kerela o fundavnocidibe angleder ki tli deklaracija keda bičhalela pe tuke. Te na kerdžam odova, ja pale te mislinea kaj o fundavnocidibe tano but hari, tegani trebela tu korkori te pišine odova ko Javera informacije kobor masekija kerdžan sine buti ki Švedija ko nakhlo berš hem kaj tu mangea te ovel tut fundavnocidibe bašo odova vakti.
Sine tut disave koštiba bašo kola šaj te del pe tuke cidibe?
Te sine tut disave koštiba kaj te šaj te kere buti, ko disave situacije tu šaj te kere cidibe bašo odova ki tli deklaraija. O cidibe kerela i taksa te ovel potikni. Tu šaj te kere cidiba ko primer bašo akala buča
- Tu trebela te kere baro drumo dži ki tli buti hem kotar tli buti
- Tu bešea ko javer than a tli familija ko javer odoleske so tu kerea buti odori.
Isi tut jek firma?
Te isi tut jek firma tegani tu ka trebel hem te phere o formulari kaske vakerela pe näringsbilaga (NE-bilaga). Odova mukheja jekhethane tle deklaraciaja. Ki näringsbilaga pherea o podatke bašo tle firmakiri buti. I näringsbilaga isi ola akava anav SKV 2161 hem tu šaj pišinea ola kotar skatteverket.se ja aple šaj te poručinela te telefonirindžan ko Skatteupplysningen ko akava broj 0771-567 567.
Isi jek gajd isar pherela pe jek deklaracija. O gajdi tano ki švedikani hem anglikani čhib.
Sar bičhalea i deklaracija?
Tu šaj te bičhale i deklaracija ko jek kotar akala čhanija:
- ko api Skatteverket
- ko sms
- telefoniribaja
- e e-servizea Lovelejbaskiri deklaracija 1
- bičhalindor i lilali deklaracija
O teksti ko api, o sms servizi, o e-servizi hem i deklaracija tane ki švedikani čhib. Te deklaririndžan telefoneja tegani šaj dela pe tuke informacija ki švedikani ja pale englikani čhib.
Kodija ki lovelejbaskiri deklaracija
Obično keda avela tuke i deklaracija othe isi kodija.Tu šaj odole kodencar te deklaririne.
Te nane tut disave kodija ki deklaracija odova obično značinela tu trebela te menine diso ki deklaracija.
Te našaldžan o kodija tegani našti te bičhalen pe tuke neve. Odova važinela hem te na funkcirinena o kodia odoleske so diso menindža pe ki tli deklaracija palo odova so pherdža pe kotar o Skatteverket.
Te nane tut disave kodia ko than bašo odova tu šaj te deklaririne ko e-servizi, te isi tut jek e-legitimacija. Te na tu šaj te deklaririne e lilale deklaraciaja.
Ko api
Tu šaj te deklaririne ko api te odgovorinena akala buča upri tute:
- Tut isi jek e-legitimacija ja pale ali tuke deklaracija kodencar.
- u samo ka uvažine i deklaracija ja pale samo ka uvažine i deklaracija hem ka kere cidibe bašo drumo dži ki buti hem tari buti.
Adžahar šaj te deklaririne ko api:
- Huljar o api skatteverket.
- Logirin e e-legitimaciaja ja pale e kodea bašo identifiribe, odova šaj arakhea ki specifikacija ki tli deklaracija. Pišin hem tlo personalno broj ja pale slično.
- Kontrolirin kaj o podatke ki deklaracija tane šukar hem ker e drumoskoro cidibe – te isi tut pravo bašo odova.
- Uvažin i deklaracija tle e-legitimaciaja ja pale e kodea bašo potpišibe, odova arakhea ki deklaracijakiri specifikacija. Tuke avela tegani direktno jek potvrda kaj tu deklaririndžan. I potvrda sikvela kaj kaj tli deklaracija ali ko Skatteverket.
Sms-ea
Tu šaj te deklaririne sms-ea te pasujnena akala buča upri tute:
- Tuke ali jek deklaracija kodencar.
- Tu samo ka uvažine i dekaracija.
- Tut isi jek švedikano mobilno abonemanji.
Adžahar deklaririneja sms-ea:
- Le tli deklaracija hem kontrolirin te pasujnena o podatke.
- Arakh tle personalno kodija. Ola tane ki deklaracijakiri specifikacija.
- Le o kodi bašo potpišibe. Sms-in tlo personalno broj ja pale slično buča hem o kodi bašo potpišibe ko 71144. Ma čhiv e Phuvjakoro kodi anglo 71144, te uljan da ki javer phuv a na ki Švedija. Ma bistre te mukhe čučo than maškar o personalno broj hem o kodi bašo potpis. Ko primer: BBMMDDGGGG 99999999.
- Adžiker te avel tuke sms palal. O sms zorakerela kaj tu deklaririndžan. Šaj te lel dži ko 10 minutija angleder te avel tuke odova.
- Šparin o sms-zorakeribe
O kodi bašo potpišibe te na kerela, odova šaj te ovel odoleske so diso ki tli deklaracija menindža pe palo dova so bičhaldža pe tuke. Tegni trebeja te deklaririne e-legitimaciaja ko e-servizi Lovelejbaskiri deklaracija 1 ja pale e lilale deklaraciaja.
Telefoniribaja
Tu šaj te deklaririne telefoniribaja te isi tut jek deklaracija kodencar hem samo te uvažindžan i deklaracija.
Adžahar deklaririneja telefoniribaja:
- Le tli deklaracija hem kontrolirin kaj o podatke tane šukar.
- Arakh tle personalno kodia. Ola tane ki deklaracijakiri specifikacija.
- Telefonirin ko 020-567 100 (+46 8 764 92 40 te telefonirineja kotar jek aver phuv a na kotar i Švedija). Ker sar so phenela pe tuke ko telefoneskere instrukcije. Tuke šaj dela pe instrukcije ki anglikani ja pale ki švedikani čhib. Adžiker dži kote te avel tuke jek poruka ko telefoni. I poruka zorakerela kaj tli deklaracija ali andre. I poruka šparinela pe kaj te šaj te mangljan te telefonirine pale hem te šune ola pale.
E-servizea
Te isi tut jek švedikani e-legitimacija tegani šaj te kere sa keda i ko pučibe i deklaracija ko e-servizi Lovelejbaskiri deklaracija 1.
Te nane tut švedikani e-legitimacija a te alo tuke deklaracija kodencar, tegani šaj te logine ko servizi e kodencar so terdžona ki deklaracijakiri specifikacija. Othe šaj te uvažine i deklaracija hem te kere disave drumoskere cidiba, ama na javera meniba.
Adžahar deklarininea ko e-servizi:
1. Login e e-legitimaciaja ja pale e kodeja bašo identifiribe, ov terdžola ki tli deklaracijakiri specifikacija. Tu trebela hem te pišine tlo personalno broj ja pale slično. O e-servizi tano ki švedikani čhib.
2. Kontrolirin o podatke ki deklaracija hem ker odola promene so trebena. Tu te logindžan e kodencar tegani šaj te kere cidiba bašo drumo dži ki buti hem kotar i buti ama na javera promene.
3. Uvažin i deklaracija tle e-legitimaciaja ja pale e kodeja so šaj te arakhe ki tli deklaracijakiri specifikacija. Tuke ka avel direktno jek potvrda so sikavela kaj tli deklaracija ali ko Skatteverket.
Ki lilali deklaracija
Te deklaririndžan tegani obično avela tuke jek pherdi lilali deklaracija ja pale ki tli digitalikani pošta – te isi tut asavki pošta. Te na ali tuke deklaracija a džanea kaj trebela te deklaririne, tegani telefonirin ko Skatteverket ja pale dža ko jek servizeskiri kancelarija hem te den tut jek lilali deklaracija.
Adžahar deklaririneja ki jek lilali deklaracija:
- Kontrolirin o podatke ki deklaracija.
- Te trebindža te promenine: ker odova odolea so pišinea i nevi suma ki parni kocka ko odova redo kori so mangea te kere i promena.
- Potpišin tut ki deklaracija.
- Čhiv jek markica ko kuferti hem bičhal i deklaracija ko
Skatteverket
Inläsningscentralen
Inkomstdeklaration 1
FE 8000
107 75 Stockholm
Te trebindža javer te deklaririnel tuke
Tu šaj te čhive javere džikas te deklaririnel tuke, te džangljan kaj ka ovel tuke pharo korkori te kere odova. Tegani tu trebela te rode ko Skatteverket odova dženo te ovel tuke deklariribaskoro ombudsmani.
Rode odova jek masek angleder te deklaririne. Tu šaj te rode ko Skatteverketeskoro e-servizi Ombudsmani hem autorizacija ja pale ko jek formulari. O formulari tano ki anglikani hem ki švedikani čhib. O e-servizi tano samo ki švedikani čhib.
Keda ka uvažnel o Skatteverket tlo deklariribaskoro ombudsmani, tegani odova dženo produžinela te ovel odova ko Skatteverketeskoro registri sa dži kote tu na informirinea e Skatteverkete kaj odova dženo na ka ovel buteder tlo ombudsmani.
- Ansöka om deklarationsombud (SKV 4809) (ki švedikani čhib)
- Ansöka om deklarationsombud (SKV 4809) (ki anglikani čhib)
Te le palal taksa – taksakoropalal lejbe
Jek vakti palo odova so deklaririnea ka avel tuke tlo palunotaksakoro rešenje. Othe terdžola te isi tut te le taksa palal kaske so vakerela pe taksakoropalal lejbe. O taksakoropalal lejbe šaj te zavisinel ko primer kotar o manuš so platinela o lovelejbe, šaj cidindža but taksa.
Ko palunotaksakoro rešenje terdžola hem kobor ka iranel pe tuke palal.
Sar hem keda ka le tlo taksakoropalal lejbe?
Kaj te šaj te le tlo taksakoropalal lejbe trebela te informirine e Skatteverkete tlo bankakoro broj. Te nane tut disavo bankakoro konto tegani šaj te telefonirine ko Taksakoroinformiribe (Skatteupplysningen) ko 0771-567 567 ja pale dža ki jek servizeskiri kancelarija.
Te informirindžan o kontobroj najkasno keda ka mukhe tli lovelejbaskiri deklaracija tegani ka aven tuke o love automatikane ko konto. Te informirindžan o kontobroj pokasno tegani tu trebela korkori te rode o love te oven čhivde ko konto. Odova kereja adžahar so telefonirineja ko Taksakoro informiribe ko 0771-567 567 ja pale te dža ko servizeskiri kancelarija.
Informirin o konto ki jek švedikani banka
Te isi tut jek švedikani e-legitimacija tegani šaj te informirine e Skatteverkete tlo kontoskoro broj keda ka deklaririne ko e-servizi Lovelejbaskiri deklaracija 1 ja pale ko Skatteverketeskoro api. Tu šaj te prijavine o konto hem ko e-servizi Taksakorokonto.
Te nane tut švedikani e-legitimacija tegani šaj te informirine e Skatteverkete tlo kontoskoro broj. Odova šaj kereja ko disave kotar akala čhanija:
- ko bankgirot.se
External link.
ja pale - te pherdžan o formulari Skatteåterbäring till bankkonto (SKV 4802) (ki švedikani čhib)
Informirin e kontoskoro broj ki jek avrunephuvjakiri banka
Te nane tut švedikano kontobroj tegani tu šaj te le tle taksakoropalal lejbe ko jek avrunephuvjakoro bankakoro konto.
Adžahar šaj te informirine e Skatteverkete bašo avrutnephuvjakoro kontobroj:
- Pišin jek ljil kaj tu mangea te informirine jek avrunephuvjakoro bankakoro konto ko Skatteverket. Ko ljil trebela te terdžol akava:
- Tlo anav, tlo švedikano personalno broj ja pale tlo privremeno broj hem tle kontaktiribaskere podatke, sar šaj o Skatteverket te kontaktirinel tut.
- IBAN hem BIC bašo avrunephuvjakoro bankakoro konto
- Tlo potpis hem haljovde pišimo anav.
- Dikh te ovel tut jek orginalno potvrda kotar e avrunephuvjakiri banka. I potvrda na sminela te ovel popurani kotar šov masekija hem ka terdžon akala buča:
- O datum keda pišindža pe i potvrda.
- Tlo anav hem tlo švedikano personalno broj ja pale privremeno broj.
- Tli adresa hem tlo telefoneskoro broj.
- IBAN hem BIC baši tlo bankakoro konto.
- Potpis kotar jek soj bučakerdo ki banka hem oleskoro haljovdo pišimo anav.
- Bičhal o ljil tle podatkoncar hem i potvrda ko:
Skatteverket
205 30 Malmö
O Skatteverket koristinela o kontobroj sa džikote na informirinea amen diso javer.
Platin poviše taksa – pandataksa
Palo jek vreme pali deklaracija tuke ka avel tlo palunotaksakoro rešenje. Othe terdžola te trebela te platine poviše taksa kaske so vakerela pe pandataksa. I pandataksa zavisinela ko primer kotar okova kastar so isi tut lovelejbe šaj platindža but hari taksa ko Skatteverket.
Ko palunotaksakoro rešenje terdžola kobor ka platine palal hem keda mangela o Skatteverket te oven o love platime.
Keda ka platine?
Keda ka avel tuke tlo palunotaksakoro rešenje tegani tut isi 90 divesa te platine odova. Ko paluno taksakoro rešenje terdžola o datum keda o love trebena te oven ko Skateverketeskoro konto, ama tu šaj platinea i pandataksa keda ka avel tuke i deklaracija.
Kamata
Sar ka platine
Tu platinea ko bankakoro žiro broj 5050-1055. Tu šaj platinea hem ko Swish, ama tegani trebela te logine ko skatteverket.se jekhe švedikane e-legitimaciaja hem te kere palo instrukcije. O instrukcie tane samo ki švedikani čhib.
Tu mora te platine ko švedikane krune. Ma bistre te dikhe o akanutno valutakoro kursi.
Platin ko bankakoro žiro e internetbankaja
Tu šaj te platine ko bankakoro žiro ki tli intenetbanka. Tegani pherea i suma so ka platine hem tlo OCR-broj (referentikano broj). O OCR-broj terdžola ko palunotaksakoro rešenje hem ki tli lovelejbaskiri deklaracija.
Tu šaj te džane savo tano o OCR-broj ko Skatteverketeskoro servizi, odova tano samo ki švedikani čhib. Pišin tlo personalno broj ja pale slično ki kocka Personalikano- ja pale organizacijakoro broj. Palo odova bastrin ki kocka Računin.
Platin ko bankakoro žiro jekhe platibaskere kartaja
Tu te platindžan ko bankakoro žiro jekhe pherde platibaskere kartaja tegani trebela samo te čhive i suma. Tu šaj te poručine pherdi platibaskiri karta telefoniribaja ko Skateverketeskiri informacija ja pale te geljan ki jek servizeskiri kancelarija.
Ma bistre kaj odova lela disave bankakere divesa angleder te resen ko Skatteverket.
Platin kotar jek avrunephuvjakiri banka
Te platinel pe kotar jek avrunephuvjakiri banka funkcinirinela sar keda platineja kotar jek švedikani banka. Tegani trebela te phere akala podatke:
- IBAN-broj: SE56 8000 0890 1196 4624 0516
- BIC-/Swiftkodi: SWEDSESS
- Banka: Swedbank AB, SE-105 34 Stockholm
- Platibaskoroleari: Skatteverket, SE-831 87 Östersund
- Tlo personalno broj ja pale OCR-broj
Jek filmi bašo sar mukhea tli lovelejbaskiri deklaracija
Filmi baši deklaracija
O filmi sikavela sar mukhea tli lovelejbaskiri deklaracija. Ov tano tekstimo ko buteder čhibja bastrin ko CC ko filmi kaj te šaj te dikhe o teloteksti.
Akate šaj te čitine odova so vakerela pe ko filmi
Keda platinea taksa tegani tu pomožinea o društvo (sarinipe) te ovel šukar. Kaj te šaj i taksa te oveltočno tegani trebela te deklaririne. Tu ka deklaririne tle lovelejba najkasno ko 2 maj. Tuke avela i deklaracija poštaja ja pale ki tli digitalikani pošta.
Komaj (skoro) bašo sa tle lovelejba avela amenge informacija ko Skatteverket. Ko primer odova avela kotar tlo butideari (poslodavco), kotar i banka ja pale Försäkringskassan (Anglosiguribaskiri kasa). Odoleske keda avela tuke i deklaracija amendar, sa akala lovelejbija dikhena pe othe.
Adžahar deklaririnea: le te dikhe dali sa o podatke tane točna. Tej sa točno hem te na mangea te menine diso ja pale te dodanje, tegani šaj te uvažine i deklaracija tle bankakere–id:a ja pale e kodencar so alo tuke e lilale deklaraciaja. Odova kereja ko Skatteverketeskoro api. Tu šaj te deklaririne bičhalindor jek sms, telefoniribaja, koristibaja o e-servizi ja pale bičhalindor amende o lilalo formulari.
Bikindžan disavo kher/stani ja pale akcie, ja pale te isi tut tli firma? Tegani trebela korkori te menine ja pale te čhive podatke ki deklaracija.
Ko e-servizi amen pripremindžam jek dodatko tuke kori pherdo podatke tane pherde. Te isi tut pravo te kere cidibe bašo koštibe ko primer bašo drumo dži ki buti hem kotar i buti, trebela korkori te čhive o podatke ki tli deklaracija.
Ma bistre angleder sa te dikhe o regularija bašo cidibe kaj te šaj sa te ovel točno kotar o početko.
Keda tu deklaririndžan palo odova amen dikhaja tle podatke hem računinaja tli paluni taksa. Keda amen siam gotova tegani avela tuke palunotaksakoro rešenje.Othe dikhea dali ka ovel tut taksakoropalal lejbe ja pale ka platine pandataksa.
Tu so ka le palal love ola čhivena pe tuke direktno ko bankakoro konto te isi tut odova prijavimo ki amende.
Te trebela te platine tegani tu kereja odova ko Skatteverketeskoro bankakoro žiro ja pale ko Swish. Buteder informacija baši deklaracija šaj te arakhe ko skatteverket.se/deklaration.
Te trebindža tut pohor informacija baši deklaracija
Ko javera strane ko skatteverket.se isi pohor informacija baši Lovelejbaskiri deklaracija. Odova tano samo ki švedikani čhib a disavo var ki anglikani čhib.
Te trebela tut detaljirimi informacija hem na haljovea i švedikano ja pale o anglikano teksti tegani ka ovel šukar te ave ko jek servizeskiri kancelarija ja pale te telefonirine ko Skatteupplysningen (Taksakiri informacija).
Kontakta oss
Aktuellt
-
Utlandsresa i jul? Pass på med namnet!
Många planerar just nu vad de ska göra under jul och nyår. Om du nyligen gjort e...
-
Kraftsamling för att knäcka gängens ekonomi
Tillsammans med Tullverket och Kronofogdemyndigheten fick Skatteverket i augusti...
-
Tips för dig som flyttat för att studera
Har du nyligen flyttat till studieorten? Då finns det några saker du behöver tän...
Tillsammans gör vi samhället möjligt