Täälä sie saatat lukea tähelisiimat teklareeramisesta ja veron maksamisesta.
Ko sie saat sisäletulon yli vissin tason sie piät maksaa veron. Se oon se joka maksaa sisäletulon sulle joka pittää maksaa sisäle veron Verotoimistolle. Vero pittää siis olla jo piätetty ko sie saat sisäletulon. Sulla oon oikeus saaja tilispesifikasuunin elikkä vastaavan joka kerta ko sie saat sisäletulon. Spesifikasuuni näyttää kunka paljon veroa ulosmaksaja oon vetäny.
Kerran vuessa sie piät jättää sisäletuloteklarasuunin Verotoimisthoon ette vero tullee olheen aivan oikein. Sitä kuttuthaan ette sie teklareeraat. Teklarasuuni jällaa sitä sisäletuloa mitä sie sait vuotta ennen ko sie teklareeraat.
Ko sie olet teklareeranu Verotoimisto räknää ulos jos sinun vero oon tullu oikein. Viimisthääns joulukuussa sinä vuona ko sie teklareeraat sie saat preivin Verotoimistolta, ”loppuveroilmotus”. Siinä seisoo jos sie piät maksaa lissää veroja (rästiveroja) elikkä jos sie saat takashiin veroja (tulovero)
Sie piät aina teklareerata jos sulle oon lähätetty teklarasuuni. Teklarasuuni tullee postin matkassa elikkä sinun tikitaahliin preiviloohvaan, jos sulla oon semmonen (Billo, Kivra elikkä Min myndighetspost).
Jos sie et ole saanu teklarasuunia sie piät kuitenki teklareerata jos sie saatat vastata joo johonki seuraahviin sanohmiin:
Sie saatat tarvita teklareerata vaikka sulla oon sisäletuloja muusta maasta ko Ruottista. Sivula Deklarera inkomster från utlandet, sie löyät tetaljeerattua informasuunia siittä.
Sie joka olet asunu ulkomaila koko vuen saatat vississä taphauksissa tarttea teklareerata Ruottissa.
Nämät oon esimerkkiä sisäletuloista jokka pitävät olla matkassa teklarasuunissa:
Nämät oon esimerkkiä sisäletuloista jokka ei piä olla matkassa teklarasuunissa:
Sie piät jättää sisäle sinun sisäletuloteklarasuunin Verotoimisthoon viimisthääns 2 toukokuuta.
Jos sie teklareeraat 2 huhtikuusie saatat saaja sinun maholisen tuloveron jo huhtikuun alussa. Mutta silloin sie tarttet teklareerata e-palvelun, sms:in, Verotoimiston apin kautta elikkä soittamalla. Sie et saa tehhä mithään muutoksia. Ette esimerkiksi jättää liitheen räknäthään muutokseksi.
Jos sie teklareeraat jälkhiin 2 huhtikuu sie saat rahat jälemin vuen aikana.
Jos sie tarttet enämpi aikaa ette teklareerata sie saatat hakea lykkäystä. Silloin sie saat teklareerata viimisthääns 16 toukokuuta sen siihaan. Met tarttema saaja sisäle sinun lykkäyshakemuksen viimisthääns 2 toukokuuta.
Sie saatat hakea lykkäystä jollaki seuraavalla laila:
Se joka maksaa ulos sinun sisäletulot oon usseimiten ilmottannu Verotoimisthoon mitä sie olet tienanu vuen aikana. Sen takia Verotoimisto oon jo täyttäny sisäle rahamäärän siinä teklarasuunissa jonka met lähätämmä sulle. Rahamäärä jonka sie näet teklarasuunissa oon sinun pryttutulo, siis sinun sisäletulo ennen veronaavtraakia.
Jos se mitä teklarasuunissa seisoo oon oikein sie et tartte ko kirjottaa alle ja jättää sisäle teklarasuunin. Lue lissää täältä: Kunkas sie lähätät sisäle teklarasuunin./Hur skickar du in deklarationen?
Joskus sie tarttet muuttaa elikkä lisätä jotaki teklarasuuhniin. Se saattaa esimerkiksi riippua siittä ette sinun työnantaja oon jättäny väärät tiot Verotoimistolle elikkä ette sie olet myyny asunon elikkä arvopaperia.
Jos sie meinaat muuttaa elikkä lisätä jotaki sie tarttet teklareerata e-palvelussa Sisäletuloteklarasuuni 1 elikkä paperiteklarasuunila. Sulla pittää olla ruottalainen e-lekitimasuuni jos sie muutat teklarasuunia e-palvelussa. Yks poikkeus oon aavtraaki reisuista töihiin ja sieltä pois, jotako sie saatat tehhä e-palvelussa kootlaki. Lue lissää: Kunkas sie lähätät sisäle teklarasuunin.
Ko sie asut ja olet töissä Ruottissa sulla oon usseimiten oikeus perusaavtraakhiin. Perusaavtraaki oon aavtraaki jonka Verotoimisto tekkee sinun sisäletuloista tilistä, maksoista elikkä vastaavista ennen ko met räknäämä ulos sinun veron. Sen takia aavtraaki usseimiten takottaa ette sie tarttet maksaa vähempi veroa. Jos sulla oon yksityinen yritys perusaavtraakia räknäthään kansa toiminan sisäletuloista.
Siittä vuestä lähtien ko sie täytät 67 perusaavtraaki oon korkeampi.
Tämän näköset säänöt oon perusaavtraakille:
Verotoimisto oon usseimiten tehny perusaavtraakin sinun teklarasuunissa ko sie saat sen. Jos met emmä ole tehneet siä, elikkä jos sie tykkäät ette perusaavtraaki oon liika matala, sie tarttet itte kirjottaa tähhään: Övriga upplysningar/Muita tietoja, kunka monta kuukautta sie olet ollu töissä Ruottissa menny vuona ja ette sie halvaat perusaavtraakin sille aijale.
Jos sulla oon ollu kostanuksia ette saattaa olla töissä, sie saatat vississä taphauksissa tehhä aavtraakia niistä sinun teklarasuunissa. Aavtraaki tekkee ette vero laskee. Sie saatat esimerkiksi saaja aavtraakia ko:
Jos sulla oon yksityinen yritys sie piät kansa täyttää semmosen niin sanotun elinkeinoplanketin (NE-liitheen). Sen sie jätät yhessä sinun teklarasuunin kansa. Elinkeinoliitheesheen sie täytät sisäle tietoja sinun yrityksen toiminasta. Elinkeinoliitheen nimi oon SKV 2161 ja sie saatat kirjottaa ulos sen osotheelta: skatteverket.se elikkä tilata sen soittamalla Verotiethoon numerolla 0771-567 567.
Oon olemassa opas kunka sie täytät teklarasuunin. Opas oon ruottiksi ja englantinkielelä.
Sie saatat lähättää sisäle teklarasuunin jollaki seuraavista tavoista:
lähättämällä sisäle paperiteklarasuunin.
Teksti apissa, sms-palvelussa, e-palvelussa ja teklarasuunissa oon ruottiksi. Jos sie teklareeraat soittamalla sie saatat saaja informasuunin tuottiksi elikkä englantinkielelä.
Teklarasuunissa jonka sie olet saanu, oon usseimiten kootia. Sie saatat käyttää kootia ette teklareerata.
Jos sie et ole saanu kootia se riippuu usseimiten siittä ette sie tarttet muutta jotaki teklarasuunissa.
Jos sie olet menettänny kootit sie et valitettavasti saa uusia. Se jällaa kansa jos kootit oon heittänheet toimimasta sillä ko jotaki oon muutettu sinun teklarasuunissa jälkhiin ko Verotoimisto täytti sen.
Jos sulla ei ole kootia sie saatat sen siihaan teklareerata e-palvelussa, jos sulla oon e-lekitimasuuni. Muuten sie saatat teklareerata paperiteklarasuuhniin.
Sie saatat teklareerata apissa jos kaikki nämät sopivat sulle:
Näin sie teklareeraat apissa:
Sie saatat teklareerata sms:ilä jos kaikki seuraavat oon oikein sulle:
Näin sie teklareeraat sms:ilä
Jos kooti allekirjottamiselle ei toimi se johtuu siittä ette jotaki sinun teklarasuunissa oon muutettu jälkhiin ko se lähätethiin sulle. Silloin sie tarttet teklareerata e-lekitimasuunila e-palvelussa Inkomstdeklaration 1/Sisäletuloteklarasuuni 1) elikkä paperiteklarasuunila.
Sie saatat teklareerata soittamalla jos sie olet saanu teklarasuunin kootila jos sie meinaat vain hyväksyä teklarasuunin. Näin sie teklareeraat soittamalla:
Jos sulla oon ruottalainen e-lekitimasuuni sie saatat tehhä kaikkia jollako oon teklarasuunin kansa tekemistä e-palvelussa Inkomstdeklaration 1.
Jos sulla ei ole ruottalaista e-lekitimasuunia, mutta olet saanu teklarasuunin kootitten kansa, sie saatat lokata sisäle palvelhuun kootila jokka sie löyät teklarasuunin spesifikasuunissa.
Sielä sie saatat hyväksyä teklarasuunin ja tehhä maholisia reisuaavtraakia, mutta ei muita muutoksia.
Näin sie teklarareeraat e-palvelussa:
1.Lokkaa sisäle e-lekitimasuunila elikkä itenttifieerinkikootila jokka sie löyät sinun teklarasuunin spesifikasuunissa. Sie tarttet kansa kirjottaa sinun henkilönumeron elikkä vastaavan. E-palvelu oon ruottiksi.
E-tjänsten Inkomstdeklaration 1 är stängd från 19 december 2024.
Tisdag 18 mars öppnar Inkomstdeklaration för 2025.
2. Tarkasta tiot teklarasuunissa ja tehe net muutokset mitä tarttee. Jos sie olet lokanu sisäle kootila sie saatat tehhä aavtraakia reisuista töihiin ja sieltä pois, mutta ei muita muutoksia.
3. Hyväksy teklarasuuni sinun e-lekitimasuunila elikkä kootila allekirjotukselle jonka sie löyät teklarasuunin spesifikasuunissa. Sie saat varsin kuitin joka näyttää ette sinun teklarasuuni oon tullu Verotoimisthoon.
Jos sie piät teklareerata sie olet usseimiten saanu täytetyn teklarasuunin lähätetyksi sulle paperille elikkä tikitaalin preiviloovan kautta, jos sulla oon semmonen. Jos sie et ole saanu teklarasuunia, mutta tiät ette sie piät teklareerata, sie saatat soittaa Verotiethoon elikkä mennä palvelukontturhiin ette sie saat paperiteklarasuunin.
Näin sie teklareeraat paperiteklarasuuhniin:
Sie saatat antaa jonku muun teklareerata sulle jos sie tiät ette sulla tullee olheen hankala tehhä sitä itte. Silloin sie piät hakea Verotoimiston tykönä ette henkilöstä tullee sinun teklarasuuniasiahenkilö.
Hae viimisthääns kuukautta ennen ko sie piät teklareerata. Sie saatat hakea Verotoimiston e-palvelussa Ombud och behörigheter/Asiahenkilö ja pätevyyksiä elikkä planketin kautta. Planketti oon englantinkielelä ja ruottiksi. E-palvelu ei ole ko ruottiksi.
Ko Verotoimisto oon hyväksynny sinun teklarasuuniasiahenkilön se henkilö tullee jatkamhaan olheen sitä, Verotoimiston rekisterissä, siiheen saakka ette sie ilmotat Verotoimisthoon ette henkilö ei ennää piä olla asiahenkilö.
Jonku aikaa jälkhiin ko sie olet teklareeranu sie saat sinun loppuveroilmotuksen. Siinä seisoo jos sie saat takashiin veroja, niin sanottu ulovero. Tulovero saattaa esimerkiksi riippua siittä ette se joltako sue saat sisäletulon oon vetäny liika paljon veroa.
Loppuveroilmotuksessa seisoo kansa kunka paljon sie piät saaja takashiin.
Ette saaja sinun tuloveron sie tarttet ilmottaa Verotoimistolle sinun pankkokonttunumeron. Jos sulla ei ole pankkokonttua sie saatat soittaa Verotiethoon telefoonila 0771-567 567 elikkä mennä palvelukontturhiin.
Jos sie ilmotat konttunumeron viimithääns ko sie jätät sinun sisäletuloteklarasuunin sie saat auttomaattisesti rahat konthuun. Jos sie ilmotat konttunumeron jälemin sie piät itte vaatia rahat sisälepantuksi konthuun. Sen sie tehet soittamalla Verotiethoon 0771-567 567 elikkä ette sie käyt palvelukontturissa.
Jos sulla oon ruottalainen e-lekitimasuuni sie saatat ilmottaa sinun konttunumeron Verotoimisthoon samala ko sie teklareeraat e-palvelussa Inkomstdeklaration 1/Sisäletuloteklarasuuni 1 elikkä Verotoimiston apissa. Sie saatat kansa ilmottaa kontun e-palvelussa Skattekonto/Verokonttu.
Jos sulla ei ole ruottalaista e-lekitimasuunia sie saatat ilmottaa konttunumeron Verotoimisthoon. Sie saatat tehhä sen jollaki näilä alla olevista tavoista:
Jos sulla ei ole ruottalaista konttunumeroa sie saatat saaja sinun tuloveron ulkomaanlaisheen pankkokonthuun.
Näin sie ilmotat Verotoimisthoon ulkomaanlaisen konttunumeron:
Verotoimisto käyttää konttunumeroa niin kauon ette sie olet ilmottannu meile jotaki muuta.
Jonku aikaa jälkhiin ko sie olet teklareeranu sie saat sinun loppuveroilmotuksen. Siinä seisoo jos sie tarttet maksaa lissää veroja, niin sanottua rästiveroa. Rästivero saattaa riippua siittä ette se joltako sie saat sisäletulon oon maksanu liika vähän veroa Verotoimisthoon.
Loppuverotiossa seisoo kansa kunka paljon sie piät maksaa ja koska Verotoimisto viimisthääns tarttee saaja rahat.
Sie piät maksaa 90 päivän sisäle siittä ko sie olet saanu sinun loppuveroilmotuksen. Taatumi ko rahat viimisthääns pitävät olla Verotoimiston kontussa seisoo loppuveroilmotuksessa, mutta sie saatat maksaa sinun rästiveron ko sie olet saanu sinub teklarasuunin.
Sie maksat pankkojiirun kautta pankkojiirunumehroon 5050-1055. Sie saatat kansa maksaa Swish:in kautta mutta silloin sie piät lokata sisäle osotheele: skatteverket.se ruottalaisela e-lekitimasuunila ja seurata instryksuunia. Instryksuunit oon vain ruottiksi.
Sie piät maksaa ruottin kruunuila. Älä unhouta tarkastaa aktyelliä valyttakursia.
Sie saatat maksaa sinun internettipankossa pankkojiirun kautta. Silloin sie täytät sisäle summan mitä sie piät maksaa ja sinun OCR-numeron (referensinumero). OCR-numero seisoo loppuveroilmotuksessa ja sinun sisäletuloteklarasuunissa.
Sie saatat kansa ottaa selvää sinun OCR-numeron Verotoimiston palvelussa, joka ei ole ko ruottiksi. Kirjota henkilönumero elikkä vastaava ruuthuun Person- eller organisationsnummer. Klikkaa sitten ruuthuun Beräkna.
Jos sie maksat pankkojiirun kautta jo täytetyllä sisälemaksokortila sie et tartte ko täyttää summan. Sie saatat tilata täytettyjä sisälemaksokorttia soittamalla Verotiethoon elikkä mennä yhtheen palvelukontturhiin.
Muista ette se ottaa jonku pankkopäivän ennen ko rahat tulevat perile Verotoimisthoon.
Ette maksaa ulkomaanlaisesta pankosta toimiii samhaan laihiin ko ette maksaa ruottalaisesta pankosta. Silloin sie tarttet täyttää sisäle nämät tiot:
Filmi näyttää kunka sie jätät sisäle sinun sisäletuloteklarasuunin. Se oon tekstattu monela kielelä. Paina CC filmissä ette näyttää alatekstiä.
Ko sie maksat veroja sie eesautat tekheen yhtheiskuntaa maholiseksi. Sie piät teklareerata ette verosta tullaa oikea. Sie piät teklareerata sinun sisäletuloja viimisthoons 2 toukokuuta. Sie saat teklarasuunin postissa elikkä sinun tikitaahliin preiviloohvaan.
Met Verotoimistossa saama informasuunia usseimista sinun sisäletuloista. Esimerkiksi sinun työnantajalta, pankolta elikkä Försääkrinkikassalta. Sen takia nämät sisäletulot oon jo teklarasuunissa jonka sie saat meiltä.
Näin sie teklareeraat: Ala tarkastamhaan ette kaikki tiot oon oikeat. Jos kaikki oon oikeat, ja sie et halvaa tehhä mithään muutoksia elikkä lissäyksiä, sie saatat hyväksyä teklarasuunin pankko-id:lä elikkä kootila jokka sie olet saanu paperiteklarasuunissa. Sie tehet sen helposti Verotoimiston apissa. Sie saatat kansa teklareerata sms:aamalla, soittamalla, käyttämällä e-palvelua elikkä lähättämällä paperiplanketin meile.
Oleks myyny asunon elikkä aktsieita, elikkä oleks yrittäjä? Silloin sie tarttet itte muuttaa elikkä lisätä tietoja teklarasuuhniin.
E-palvelussa met olema valmistanheet sulle liitheen jossako paljon tietoja oon jo täytetty. Jos sulla oon oikeus tehhä aavtraakia kostanuksista, esimerkiksi reisuista töihiin ja sieltä pois, sie piät itte lisätä tiot sinun teklarasuuhniin.
Muista ette ensinä tarkastaa sääntöjä aavtraakille niin ette se tullee oikein jo alusta asti.
Ko sie olet teklareeranu met menemä läpi sinun tietoja ja räknäämä ulos sinun lopulisen veron. Ko met olema valhmiit sie saat sinun loppuveroilmotuksen. Siinä sie näet jos sie saat tuloveroja elikkä maksaa rästiveroja.
Sie, joka piät saaja rahhaa takashiin, saat net suohraan sinun pankkokonthuun jos sie olet ilmottannu sen meile.
Jos sie piät maksaa sie tehet sen Verptoimiston pankkojiihruun elikkä Swish:ilä. Lissää informasuunia teklarasuunista sie löyät osotheela: skatteverket.se/deklaration.
Muila sivuila osotheela: skatteverket.se oon syvenettyä informasuunia sisäletuloteklarasuunista. Sitä oon vain ruottiksi ja joskus englantinkielelä.
Jos sie tarttet perustheelista informasuunia ja sie et käsitä sitä ruottalaista elikkä englantinkielistä tekstiä sie olet tervetullu käyhmään palvelukontturissa elikkä soittamhaan Verotiethoon 0771-567 567.