Dieđihit sisaboađu ja máksit vearu
Dás gávnnat iešguđetge gillii dieđuid sisaboahtodieđiheamis.
Dás gávnnat deháleamos dieđuid sisaboahtodieđiheamis ja vearromáksimis. Seamma teaksta gávdnu sihke ruoŧagillii ja eará gielaide. Gávnnat ruoŧagielat teavstta go deaddilat eananspábbii mii lea váldobajilčállaga bajábealde.
Don galggat máksit vearu go du sisaboahtu manná badjel vissis meari. Son gii máksá dutnje sisaboađu galgá máksit vearu Vearrokantuvrii. Vearru galgá juo gesson go don oaččut sisaboađu. Dus lea riekti oažžut bálkáspesifikašuvnna dahje eará sullasaš dieđu go juohke gearddi go oaččut sisaboađu. Spesifikašuvnnas oainnát man ollu vearu bargoaddi lea geassán.
Don galggat aktii jahkái sisaboahtovearrodieđáhusa addit Vearrokantuvrii vai vearru gessojuvvo jur riekta. Dat gohčoduvvo sisaboađodieđiheapmi. Vearrodieđáhus guoská sisabohtui mii dus lei mannan jagi.
Go leat dieđihan sisaboađu, de rehkenastá Vearrokantuvra jus du vearru lea riekta. Dan jagi go leat dieđihan sisaboađu, don oaččut reivve maŋimusa juovlamánu Vearrokantuvrras, nu gohčoduvvon “loahppavearrodieđáhus”. Dasa lea čallon jus galggat máksit eanet vearu(bázahusvearru) dahje jus oaččut vearu ruoktot(ruovttoluotta vearru).
Gii galgá dieđihit sisaboađu?
Galggat alu dieđihit sisaboađu jus leat ruoktut oččot vearrodieđáhusa. Vearrodieđáhus boahtá boasttain dahje digitála boastalođái, jus du lea dakkár (Billo, Kivra dahje Min myndighetspost).
Muhtomin galggat dieđihit sisaboađu vaikko it leat ožžon vearrodieđáhusa
Jus it leat ožžon vearrodieđáhusa de galggat lihkká dieđihit sisaboađu jus sáhtát vástidit juo muhtin dáid čuoččuhusaide:
- Don orrut Ruoŧas olles 2025 ja dus lei badjel 24 872 ruvnna sisaboahtu ovdamearkka dihte bálkká, iežat fitnodaga dahje váhnenruđa geažil.
- Don orrut Ruoŧas muhtin oasi 2025 ja du sisaboahtu Ruoŧas lei badjel 100 ruvnna ovdamearkka dihte bálkká, iežat fitnodaga dahje váhnenruđa geažil.
- Dus lei 2025 kapitála sisaboahtu Ruoŧas mii lei badjel 200 ruvnna dahje eanet. Kapitála sisaboahtu sáhttá ovdamearkka dihte leat sestojuvvon ruđa reantu dahje vuvdojuvvon ossosiid dahje eará árvobáhpiriid vuoitu. Sáhttá maid leat muhtin orohaga vuovdin dahje viessoláiggu vuoitu.
- Dus lei 2025 sisaboahtu moadde olbmo fitnodagas. Sáhttet leat ovdamearkka dihte juogadeamit, ovddut dahje eará buhtadusat. Moadde olbmo fitnodat lea oasussearvi mas eanemus njealje olbmo fárrolaga oamastit eanet go beali ossosiin.
- Ođđajagimánu 1 beaivvi 2025, don oamastit giddodaga, dahje oasi giddodagas. Giddodat lea ovdamearkka dihte viessu, astoáiggeviessu dahje eananbinná.
- Don leat ožžon reivve Vearrokantuvrras (“gohččuma”) mas gáibidit du vearrodieđáhusa. Gohččuma oaččut boasttas dahje digitála boasttas.
Don soaittát šaddat dieđihit sisaboađu vaikko leat ožžon sisaboađu eará riikkas go Ruoŧas. Dieđihit eará riikka sisaboađu siiddus gávnnat vuđolaš dieđuid dan birra.
Don gii leat orrun olgoriikkas olles jagi šattat muhtin aktavuođain dieđihit sisaboađu Ruoŧas.
Mii vearrodieđáhusas galgá leat mielde?
Dá leat ovdamearkkat makkár sisaboađut galget leat mielde vearrodieđáhusas:
- bálká ja eará buhtádusat maid oaččut barggu aktavuođas
- ealáhat
- váhnenruhta ja gaskaboddosaš váhnenruhta
- seastima reantu ovdamearkka dihte báŋkkus
Dá leat ovdamearkkat makkár sisaboađut eai galgga leat mielde vearrodieđáhusas:
- ásahanbuhtadus, ásahanlasáhus ja viessobuhtadus
- birgenláhkedorvu
- mánáidruhta, viessodoarjja ja viessolasáhus.
- CSN:a oahppodoarjja
Goas galggat dieđihit sisaboađu?
Don galggat sisaboahtovearrodieđáhusa addit Vearrokantuvrii maŋimusa miessemánu 4. beaivvi.
Jus dieđihat sisaboađu maŋimus njukčamánu 31. beaivvi de sáhtát iežat vejolaš vearu juo oažžut ruoktut álgogeaži cuoŋománu. Muhto de galggat dieđihit sisaboađu e-bálvalusa, SMS:a, dahje riŋgema bokte. De it sáhte maidige rievdadit. Ovdamearkka dihte lasihit mildosa rehkenasto rievdadeapmin.
Jus dieđihat sisaboađu maŋŋil njukčamánu 31. beaivvi de oaččut ruđaid maŋŋelis jagis.
Jus dárbbašat eanet áiggi sisaboađudieđiheapmái
Jus dárbbašat eanet áiggi sisaboađudieđiheapmái de sáhtát ohcat maŋideami. De beasat dan sadjái dieđihit sisaboađu maŋimusa geassemánu 1. beaivvi. Mii dárbbašit oažžut maŋidan ohcamuša sisa maŋimus miessemánu 4. beaivvi.
Don sáhttá ohcat maŋideami dáid vugiid mielde:
- Čálihit sisa skatteverket.se:ii, jus dus lea e-persovdnaduođaštus
- riŋget vearrodiehtojuohkimii 0771-567 567 (eará riikkas +46 8 564 851 60)
- galledit muhtin veahkkekantuvrra
Movt deavdit vearrodieđáhusa?
Son gii máksá dutnje sisaboađu lea eanaš áiggiid dieđihan Vearrokantuvrii maid don leat dinen jagis. Danin lea Vearrokantuvra juo deavdán ruhtameari vearrodieđáhussii maid mii sáddet dutnje. Ruhtamearri maid oainnát vearrodieđáhusas lea bruttoboahtu, namalassii du sisaboahtu ovdal go vearru gesso.
Jus visot lea riekta
Jus vearrodieđáhus lea riekta, de galggat beare čállit vuollái ja sáddet vearrodieđáhusa sisa. Loga eanet dás Movt sáddet sisa vearrodieđáhusa?
Jus dárbbašat rievdadit dahje lasihit juoidá
Muhtomin dárbbašat rievdadit dahje lasihit juoidá vearrodieđáhussii. Sáhttá ovdamearkka dihte leahkit ahte bargoaddi lea vearrut dieđuid addán Vearrokantuvrii dahje ahte don leat vuovdán muhtin viesu dahje árvobáhpira.
Jus meinet rievdadit dahje lasihit juoidá de galggat dieđihit sisaboađu e-bálvalusas Sisaboahtovearrodieđáhus 1:as dahje bábervearrodieđáhusas. Dus galgá leat ruoŧa e-persovnnaduođaštusa jus meidnet rievdadit vearrodieđáhusa e-bálvalusain. Akta spiehkasteapmi lea gessosat gaskkal barggu ja ruovttu maid sáhtát maiddái dahkat e-bálvalusas kodaiguin. Loga eanet dás Movt sáddet vearrodieđáhusa.
Leat go ožžon riekta vuođđogessosa?
Eanáš áiggi dus lea riekti vuođđogessosii go orut ja barggat Ruoŧas. Vuođđogeasus lea geasus maid Vearrokantuvra geassá du sisaboađuin ovdal go vearru rehkenasto, nugo bálkkás, buhtadusas dahje sullasaš. Dat mearkkaša ahte geasus eanaš áiggi dagaha ahte don mávssát unnit vearu. Jus dus lea oktoeaiggátfitnodat rehkenasto vuođđogeasus maiddái dan doaimma sisaboađus.
Dan rájes go don šattat 67 jagi lea vuođđogeasus alit.
Dákkárat lea vuođđogessosa njuolggadusat:
- Jus leat orrun ja dus lea leamaš sisaboahtu Ruoŧas olles jagi de dus lea riektu vuođđogessosii olles jahkái.
- Jus don leat orrun olgoriikkas muhtin oasi jagis muhto dieđihan unnimus 90 proseantta iežat sisaboađus Ruoŧas dan jagis, de dus lea riekti vuođđogessosii olles jahkái.
- Jus don leat orrun ja dus lea leamaš sisaboahtu muhtin oasi jagis Ruoŧas de dus lea riekti vuođđogessosii daid mánuid go leat orrun dáppe.
Vearrokantuvra lea eanaš áiggi geassán vuođđogessosa go don oaččut vearrodieđáhusa. Jus eat leat dahkan dan, dahje jus jáhkát ahte vuođđogeasus lea ila vuollegaš, de galggat ieš čállit Lassi dieđuide galle mánu leat bargat Ruoŧas mannan jagi ja ahte don háliidat vuođđogessosa dan áigodagas.
Leat go dus leamaš doaibmagolut main sáhtát oažžut gessosa?
Jus dus leat leamaš doaibmagolut vai beasat bargat, de sáhtát muhtin aktavuođain oažžut gessosa du vearrodieđáhusas. Geasus vuoliha vearu. Ovdamearkka dihte sáhtát oažžut gessosa
- go mátkkoštat guhkás gaskkal ruovttu ja barggu.
- go orut eará báikkis go du bearaš barggu dihte.
Leago dus oktoeaiggátfitnodat?
Jus dus lea oktoeaiggátfitnodat de galggat maiddái deavdit nu gohčoduvvon ealáhusmildosa (NE-mielddus). Dan attát vearrodieđáhusa olis. Ealáhusmildosii čálát ja dieđihat makkár doaimmat fitnodagas leat. Ealáhusmildosa namma lea SKV 2161 ja sáhtát čálihit dan skatteverket.se siiddus dahje diŋgot dan Vearrodiehtojuohkimis go riŋget 0771 567 567.
Gávdnu ráva mii veahkeha du deavdit vearrodieđáhusa. Ráva lea ruoŧagillii ja eaŋgalasgillii.
Movt sáddet sisa vearrodieđáhusa?
Sáhtát sáddet sisa vearrodieđáhusa muhtin dáin vugiin:
- sms:a bokte
- riŋgema bokte
- e-bálvalusa Sisaboahtovearrodieđáhusa 1 bokte
- sáddet bábervearrodieđáhusa
Sms-bálvalusa, e-bálvalusa ja vearrodieđáhus teaksta lea ruoŧagillii. Jus riŋgemiin dieđihat sisaboađu de lea vejolašvuohta oažžut dieđuid ruoŧagillii ja eaŋgalasgillii.
Sisaboahtovearrodieđáhusa kodat
Vearrodieđáhusas maid leat ožžon das leat eanaš áiggi kodat. Kodaid sáhtát geavahit sisaboađu dieđidettiin.
Jus it leat ožžon kodaid de dat eanaš áiggi mearkkaša ahte don fertet rievdadit juoidá vearrodieđáhusas.
Jus leat láhppán kodaid, de ii leat vejolašvuohta oažžut ođđa kodaid. Dát guoská maid go kodat eai doaimma šat dan dihte go juoga lea rievdaduvvon dan rájes go Vearrokantuvra devddii vearrodieđáhusa.
Jus du eai leat kodat de sáhtát dieđihit sisaboađu e-bálvalusas, jus dus leat e-persovdnaduođaštus. Muđui sáhtát dieđihit sisaboađu bábervearrodieđáhusain.
Sms:ain
Sáhtát dieđihit sisaboađu sms:a bokte jus visot dát sohpet dutnje:
- Leat ožžon vearrodieđáhusa aktan kodain
- Meidnet beare dohkkehit vearrodieđáhusa.
- Dus lea ruoŧa mobiilaabonnemeanta.
Ná dieđihat sisaboađu sms:ain:
- Váldde sadjosii iežat vearrodieđáhusa ja dárkkis dieđuid.
- Oza iežat persovnnalaš kodaid. Daid gávnnat vearrodieđáhusa spesifikašuvnnas.
- Váldde sadjosii vuolláičállin koda. Sádde sms:ain iežat persovnnanummara dahje vástideaddji nummara aktan vuolláičállin kodain, 71144 nummarii. Ale čále riikakoda ovddabeallai 71144, vaikko leat eará riikkas go Ruoŧas. Ale vajálduhte gaskka gaskkal persovdnanummara ja vuolláičállin koda. Ovdamearka: JJMMBBNNNN 99999999.
- Vuordde sms:a maid oaččut ruovttoluotta. Sms:a duođašta ahte leat dieđihan sisaboađu. Sáhttá ádjánit logi minuvtta ovdal go oaččut vástádusa.
- Seastte sms-duođaštusa
Jus koda ii doaimma dat mearkkaša ahte juoga lea rievdaduvvon vearrodieđáhusas dan rájes go dat sáddejuvvui dutnje. De fertet e-persovnnaduođaštusain dieđihit sisaboađu e-bálvalusas Sisaboahtovearrodieđáhus 1 dahje bábervearrodieđáhusas.
Riŋgemiin
Sáhtát dieđihit sisaboađu riŋgemiin jus leat ožžon vearrodieđáhusa kodaiguin ja meidnet beare dohkkehit vearrodieđáhusa.
Ná dieđihat sisaboađu riŋgemiin:
- Oza sadjosii vearrodieđáhusa ja dárkkis dieđuid.
- Oza iežat persovnnalaš kodaid. Daid gávnnat vearrodieđáhusa spesifikašuvnnas.
- Riŋge 020-567 100 (+46 8 764 92 40 jus riŋget eará riikkas go Ruoŧas). Čuovo báddejuvvon rávvagiid. Rávvagiid sáhtát oažžut sihke eaŋgalas- ja ruoŧagillii. Vuordde ahte diehtu lohkkojuvvo telefovnnas. Diehtu duođašta ahte vearrodieđáhus lea sáddejuvvon sisa. Diehtu sestojuvvo, nu ahte don sáhtát riŋget fas ja guldalit dan aktii vel.
E-bálvalusain
Jus dus lea ruoŧa e-persovdnaduođaštus de sáhtát dahkat visot mii guoská vearrodieđáhussii e-bálvalusas Sisaboahtovearrodieđáhus 1.
Jus dus ii leat ruoŧa e-persovnnaduođaštus, muhto leat ožžon vearrodieđáhusa aktan kodain, de beasat sisa bálvalussii kodaiguin maid gávnnat vearrodieđáhusa spesifikašuvnnas. Doppe sáhtát dohkkehit vearrodieđáhusa ja lasihit vejolaš mátkegessosiid, muhto it eará rievdadit.
Ná dieđihat sisaboađu e-bálvalusas:
- Čálit sisa e-persovnnaduođaštusain dahje olmmošdovdiidan kodaiguin maid gávnnat vearrodieđáhusa spesifikašuvnnas. Fertet maid čállit persovnnanummara dahje vástideaddji nummara. E-bálvalus lea ruoŧagillii.
2. Dárkkis dieđuid vearrodieđáhusas ja rievdat jus dárbbašat. Jus leat čálihan sisa kodaiguin de sáhtát lasihit gessosiid gaskkal ruovttu barggu, muhto it eará rievdadit.
3. Dohkket vearrodieđáhusa e-persovnnaduođaštusain dahje vuolláičállin kodain maid gávnnat vearrodieđáhusa spesifikašuvnnas. Oaččut dakkaviđe guitte mii duođašta ahte vearrodieđáhus lea ollen Vearrokantuvrii.
Bábervearrodieđáhusain
Eanaš áiggi don oaččut válmmas devdojuvvon vearrodieđáhusa bábirhámis dahje digitála reivelođá bokte, jus dus lea dakkár, jus don galggat dieđihit sisaboađu. Jus it leat ožžon vearrodieđáhusa, muhto dieđát ahte galggašit dieđihit sisaboađu, de sáhtát riŋget Vearrodiehtojuohkimii dahje mannat veahkkekantuvrras viežžame bábervearrodieđáhusa.
Ná dieđihat sisaboađu báberdieđáhusain:
- Dárkkis vearrodieđáhusa dieđuid.
- Jus fertet rievdadit juoidá: rievdat ja čálle ođđa ollislašsupmi vilges ruvttui dan ráiddus mas háliidat rievdadit.
- Vuolláičále vearrodieđáhusa.
- Deaddil boastamearkka reivii ja sádde vearrodieđáhusa:
Skatteverket
Inläsningscentralen
Inkomstdeklaration 1
FE 8000
107 75 Stockholm
Jus muhtin eará ferte dieđihit sisaboađu du ovddas
Jus dieđát ahte dutnje šaddá váttis dieđihit sisaboađu de sáhtát diktit eará olbmo dahkan dan du ovddas. Dan oktavuođas galggat Vearrokantuvrras ohcat ahte dat olmmoš galgá šaddat du vearrodieđáhusa fápmuduvvon olmmoš.
Oza maŋimus mánu ovdal go meidnet dieđihit sisaboađu. Sáhtát ohcat Vearrokantuvrra e-bálvalusas Fápmuduvvon olmmoš ja máhtolašvuohta dahje skoviin. E-bálvalus gávdnu dušše ruoŧagillii.
Go Vearrokantuvra lea dohkkehan du vearrodieđáhusa fápmuduvvon olbmo de son lea Vearrokantuvrra registeris dassážii go don dieđihat Vearrokantuvrii ahte olmmoš ii galgga šat leahkit fápmuduvvon olmmoš.
Oažžut ruoktut vearu – ruovttoluotta vearru
Muhtin áiggi maŋŋil go leat dieđihan sisaboađu de oaččut loahppavearrodieđu. Dasa lea čallon jus oaččut ruoktut vearu, nu gohčoduvvon ruovttoluotta vearru. Ruovttoluotta vearru sáhttá ovdamearkka dihte oažžut go son geas oažžut sisaboađu lea geassán ila ollu vearu.
Loahppavearrodieđus oainnát maid man ollu oaččut ruoktut.
Movt ja goas oaččut ruovttoluotta vearu?
Jus galggat oažžut vearu ruovttoluotta de fertet Vearrokantuvrii addit iežat báŋkokontonummara. Jus dus ii leat báŋkokonto de sáhtát riŋget Vearrodiehtojuohkimii 0771-567 567 dahje mannat soames veahkkekantuvrras.
Oaččut ruđaid automáhtalaččat kontui, jus dieđihat kontonummara maŋimus go attát sisa iežat sisaboahtovearrodieđáhusa. Jus dieđihat kontonummara maŋŋil de fertet ieš sihtat bidjat ruđaid kontoi. Dan dagat go riŋget Vearrodiehtojuohkimii 0771-567 567 dahje go manat veahkkekantuvrras.
Dieđihit kontonummara ruoŧa báŋkkus
Jus dus ii leat ruoŧa kontonummar de lea vejolaš oažžut vearu ruovttoluotta olgoriikka báŋkokontui.
Jus dus ii leat ruoŧa e-persovdnaduođaštus de sáhtát iežat kontonummara dieđihit Vearrokantuvrii. Dan sáhtát dahkat muhtin dáin vugiin:
Dieđihit kontonummara olgoriikka báŋkkus
Jus dus ii leat ruoŧa kontonummar de lea vejolaš oažžut vearu ruovttoluotta olgoriikka báŋkokontui.
Olgoriikka kontonummara dieđihat Vearrokantuvrii ná:
- Čále reivve, mas don dieđihat iežat olgoriikka báŋkokonto Vearrokantuvrii. Reivii galggat čállit dáid:
- Du nama, du ruoŧa persovdnanummara dahje ovttastahttinnummara ja kontodieđuid mas Vearrokantuvra olaha du.
- Olgoriikka kontonummara IBAN ja BIC.
- Iežat vuolláičállaga ja iežat namma čielggadeami
- Hága originála duođaštusa olgoriikka báŋkkus. Duođaštus ii oaččut leat boarrásit go guhtta mánu ja das galgá leat dát mielde:
- Dáhton goas duođaštus čállui.
- Du namma ja du ruoŧa persovdnanummar dahje ovttastahttinummar.
- Du adreassa ja du telefonnummar.
- Báŋkokonto IBAN ja BIC.
- Báŋkobargi vuolláičála ja namma čielggadeapmi
- Sádde reivve mas du dieđut ja duođaštusat leat:
Skatteverket
205 30 Malmö
Vearrokantuvra geavaha kontonummara dassái dieđihat eará.
Máksit eanet vearu – bázahusvearru
Muhtin áiggi maŋŋil go leat dieđihan vearu de oaččut loahppavearrodieđu. Das dieđihuvvo jus fertet máksit eanet vearu, nu gohčoduvvon bázahusvearru. Bázahusvearru šaddá ovdamearkka dihte dalle go son gii máksá dutnje sisaboađu lea máksán ila unnán vearu Vearrokantuvrii.
Loahppavearrodieđus oainnát maid man ollu galggat máksit ja goas Vearrokantuvra dárbbaša ruđaid maŋemuš.
Goas galggat máksit?
Don galggat máksit 90 beaivvi siste dan rájes go ožžot loahppavearrodieđu. Dáhtona goas ruđat galget maŋimuš leahkit Vearrokantuvrra kontos gávnnat loahppavearrodieđus, muhto sáhtát máksit bázahusvearu juo dalle go leat ožžon vearrodieđáhusa.
Reantu
Movt máksit?
Don mávssát báŋkogiroin báŋkogironummarii 5050-1055. Sáhtát maid máksit swishain, muhto de galggat čálihit sisa skatteverket.se iežat ruoŧa e-persovdnaduođaštusain ja čuovvut rávvagiid. Rávvagat leat dušše ruoŧagillii.
Don fertet máksit ruoŧa ruđaiguin. Muitte fal dárkkistit ahte valuhttakursa lea áigeguovdil.
Máksit báŋkogiron interneahttabáŋkkus
Don sáhtát máksit báŋkogiron interneahttabáŋkkus. Deavdde ruhtameari maid galggat máksit ja iežat OCR-nummara (čujohusnummar). OCR-nummara gávnnat loahppavearrodieđus ja iežat sisaboahtovearrodieđáhusas.
Gávnnat maid iežat OCR-nummara Vearrokantuvrra bálvalusas, mii lea ruoŧagillii. Čále iežat persovnnanummara dahje vástideaddji nummara Persovdna- dahje organisašuvdnanummar ruvttui. Deaddil dasto Meroštala ruvttui.
Máksit báŋkogiro bokte sisamáksinkoarttain
Jus mávssat báŋkogiro bokte válmmas devdojuvvon sisamáksinkoarttain de it dárbbaš go deavdit ruhtameari. Sáhtát diŋgot válmmas devdojuvvon máksinkoartta go riŋget Vearrokantuvrii dahje mannat veahkkekantuvrras.
Muitte ahte ádjána moadde beaivvi ovdal go ruđat ollejit Vearrokantuvrii.
Máksit olgoriika báŋkkuin
Máksit olgoriikka báŋkkuin lea seammá go máksit ruoŧa báŋkkuin. Don galggat deavdit dáid dieđuid:
- IBAN-nummar: SE56 8000 0890 1196 4624 0516
- BIC/Swiftkod: SWEDSESS
- Báŋko: Swedbank AB, SE-105 34 Stockholm
- Máksinvuostáiváldi: Skatteverket, SE-831 87 Östersund
- Du persovdnanummar ja OCR-nummar
Jus dárbbašat čiekŋuduvvon dieđuid vearrodieđáhusa birra
Eará siidduin skatteverket.se gávnnat čiekŋuduvvon dieđuid sisaboahtovearrodieđáhusa birra. Dat gávdnu beare ruoŧagillii ja muhtomin eaŋgalasgilli.
Jus dárbbašat bienalaš dieđuid ja it ipmir ruoŧa ja eaŋgalas teavstta de leat bures boahtin galledit veahkkekantuvrra dahje riŋget Vearrodiehtojuohkimii.